【Emily】太古培訓10大學生 助籌備聖誕市集

【明報專訊】政府成日提到要「搶人才」，有企業就趁學生未畢業，提供機會畀來自兩間大學嘅10名學生，參與職業及生活規劃、氣候變化、AI（人工智能）等培訓之後，協助設計同策劃喺今年12月舉辦嘅「白色聖誕市集」。市集去年喺鰂魚涌太古坊舉行，由太古地產Placemaking Academy（SPPA）負責，今年公開招募後，獲得嚟自6間本地大學共38名學生提交活動建議書，經評審後有10名學生脫穎而出。

舉行活動期間，團隊要採取減廢措施，去年嘅團隊就運用咗舊紡織回收物料製作5000朵「再造聖誕花」、場地設施及消費性廢物分流率達至91.4%，今年團隊同樣要制定減碳方案。除咗大學生，活動今年首次設有少年計劃，由太古地產與東區民政處東區青藤計劃合辦，招募咗7名中學生，負責設計營運市集餐飲嘅電子平台同原創音樂表演。