【Emily】列車車廠同被塗鴉 港鐵報警籲愛惜

【明報專訊】有網民噚日喺facebook群組分享港鐵將軍澳線列車車身被塗鴉嘅相，見到第二至第三卡車廂有啲五顏六色嘅英文字。港鐵話職員噚日朝早發現塗鴉後，已安排列車駛回將軍澳車廠調查，並報警，列車服務無受影響。另外，港鐵上星期一晚喺小蠔灣車廠都發現有列車被塗鴉，事件同樣已交警方跟進，呼籲公眾要愛惜鐵路設施。塗鴉車廂駛出車站圖片流傳，惹來唔少網民議論，有人話違法唔啱，睇番閉路電視實捉到塗鴉者，但亦有人話「列車繽紛咗」、「列車形象馬上充滿活力」。

有網民稱違法 有稱令列車「繽紛咗」

警方就話，噚日中午接獲港鐵職員報案，指喺列車上發現22米乘1.5米大嘅塗鴉，另外喺9月18日夜晚10點亦接報，小蠔灣車廠有列車出現3幅塗鴉，共約10米乘1.5米大，兩單案件均列刑事毁壞跟進。