【Emily】高官議員紛現場觀亞運 杭州撐港隊 特首見證張家朗奪金

【明報專訊】特首李家超、文化體育及旅遊局長楊潤雄、部分立法會議員去咗杭州支持港隊運動員出戰亞運，其中李家超一早表明「今天（昨日）只做一件事：為運動員打氣」。他及楊潤雄上午分道揚鑣，楊去睇划艇，李家超去睇游泳初賽，結果楊潤雄見證到賽艇運動員林新棟同王瑋駿喺男子雙人單槳賽奪得港隊亞運首金，喺現場一齊歡呼，話喜悅無法形容。到咗晚上，李家超同楊潤雄一齊去劍擊館，見證張家朗首奪亞運金牌。

李家超噚晚接受傳媒採訪，話對於港隊表現感到振奮，相信市民見到都會感到鼓舞。有傳媒問到大型體育賽事轉播權問題，問今次本港只有一家電視台轉播（免費電視台），李家超就話每次都會按實際情况處理，今次康文署喺30幾個地方有轉播賽事。

食杭州名物定勝糕 盼港隊發揮水準

睇番唔少高官同議員嘅facebook，唔少人都去咗杭州支持港隊。香港亞運代表團團長、立法會體演文出界議員霍啟剛喺現場見證第一金，喺港隊衝線之際霍啟剛激動到跳起，然後同楊潤雄擊掌，佢哋並與港隊合照。

另外，李家超提到噚日早餐其中一款糕點叫「定勝糕」，係杭州名物，話相傳係杭州人當年為南宋名將岳飛製作嘅糕點，希望佢能戰勝回歸，所以佢都憑糕寄意，希望港隊發揮水準。