【Emily】16科大生做亞運義工 獲中聯辦培訓

【明報專訊】杭州亞運聽晚開幕，本港大學亦派出學生代表去當地做義工。香港大學派咗11個學生去當地做志願工作，噚日出發，又話亞運會主辦單位期望透過活動，深化本港學生對國家發展嘅了解與認識，畀香港青年發揮英語優勢，喺體育競技以外，同亞洲各地青年加強交流。

香港科技大學同樣有派學生去杭州亞運做義工，共16個學生噚日啟程，包括劍擊、欖球、射箭、合球校隊嘅成員，佢哋分別來自理學院、工學院、商學院、人文社會科學學院、跨學科學院，校方形容今次派出全港最大規模嘅大學生義工團，又話團隊今個星期曾參與由中聯辦教育科技部處長方磊主持嘅培訓活動，科大署理學務長周敬流亦有出席。

另外，科大話3名學生及校友會參賽，以運動員身分為港爭光，包括參加三項鐵人項目嘅伍泰龍，佢透過學生運動員入學計劃（SAAS）入讀機械及航空航天工程學系。