【Emily】當年撐參選 陶傑引「橘越淮而枳」談林作

【明報專訊】網紅林作因「綠石數字資產平台」（JPEX）一案被捕全城哄動，早年經常同林作同場出席節目同飯局嘅作家陶傑，噚日撰文回應作為「師父」當初係咪「睇錯人」。陶傑話，當初覺得英國牛津畢業、仲係大律師嘅林作「確實是塊好料子」，但話如果年輕人定力不足、選擇返去「醬缸」文化，「牛津和香港的任何師父，也沒有辦法」。網民則留言笑言，篇文係「割蓆文學範例」。

2015年林作參選區議會選舉黃大仙龍星選區，陶傑當時陪同林作報名同支持。

網民笑稱「割蓆文學範例」

陶傑噚日解釋，當時係「站在年輕人的一方」而投林作一票，不過話提醒過林作返香港要小心，而對方「後來另有上位的軌跡」，兩人也偶有見面。對於昔日仰慕佢嘅林作，一向鍾情英倫嘅陶傑引用「橘越淮而枳」作比喻，又以英王查理斯三世回歸前曾為時任財政司曾蔭權封爵一事反問，當曾蔭權捲入官非，查理斯「需要為他加持過的曾爵士發表任何評論嗎？」