【Emily】退役柴頭60號新任務 進駐鐵路博物館

【明報專訊】港鐵嘅柴油電動機車60號（Peter Quick）上年正式退役，港鐵噚日話，已經跟足「柴頭60號」原本嘅車身顏色髹咗新油，但保留番昔日嘅配件同設備，「準備好迎接新任務」，即係已進駐位於大埔嘅香港鐵路博物館。

跟足原本車身顏色髹新油

「柴頭60號」喺1970年代投入服務，由當時九廣鐵路引入，港鐵話，呢款車係東鐵線全面電氣化前最後一批引入嘅柴油電動機車之一，全面電氣化之後，佢就負責拖引貨卡同工程車喇。

港鐵上年3月底為完成歷史任務嘅「柴頭60號」拍攝短片，記錄佢喺東鐵線嘅最後旅程，由港鐵職員喺清晨將「柴頭60號」由沙田站運去羅湖編組站。事隔一年多，佢終於重返大家眼前，畀市民參觀打卡。