【Emily】貿發局巴黎擺「茶記」 以食宣傳香港

【明報專訊】貿發局喺法國巴黎舉辦「成就機遇．首選香港」論壇，仲帶咗間茶餐廳去巴黎?。政府新聞處發放嘅相片所見，貿發局以茶餐廳形式設計攤位，以綠白色做主調，地板黑白色，睇落幾有香港色彩，不過最重要係擺放咗幾個「卡位」、放埋餐牌，並即場提供蛋撻、雞批等港式小食畀在場外國與會者品嘗，以「軟實力」宣傳香港。

正喺巴黎訪問嘅財政司長陳茂波出席貿發局嘅論壇並發表演講，提到香港喺創新科技、綠色科技和綠色金融，以至文化和創意產業等都正蓬勃發展，鼓勵法國企業抓緊發展機遇。

陳茂波鼓勵法國企業抓緊機遇

陳茂波又到訪歐洲最大設計展覽機構Maison et Objet（M&O）嘅工藝品概念店，而M&O明年1月喺巴黎舉行嘅30周年紀念活動會設置香港館，有10名香港本地設計師參展。陳茂波噚日由巴黎轉往倫敦繼續訪問行程。