【Emily】恒大用VR 學生嘗「災區採訪」

【明報專訊】恒生大學同3間專上院校合作，參照職場環境等，創建一套虛擬實境（VR）協作系統融入教學中。其中「新聞傳播」主題就以地震災難現場為藍本，新聞系學生進入虛擬環境後，可扮演記者、攝影師同受訪災民等唔同角色，學習點樣喺災難地震現場報道。

恒生大學傳播學院副院長（實務）趙應春話，以往好多記者都會外派到災區採訪，但就冇乜人有採訪地震嘅經驗，只能摸住石頭過河，「學校無教，newsroom（新聞室）做老細嗰個都無話會教定（記者）」，希望系統可讓學生對災難現場「有個基本概念」。

趙應春：參考舊片 盡可能還原實况

趙應春又分享，創建平台時參考番好多以往地震嘅新聞片段，例如餘震、冧樓，亦問過採訪過四川汶川地震嘅記者，盡可能還原現實情况。佢話，唔少前線記者都反映「（地震）現場又有傷者，又有救護人員，有時仲有官員，但只有好短時間」，認為呢啲係好好嘅教學素材，畀學生認識採訪意外或災難時可能會遇到嘅兩難局面。

項目獲教育局質素提升支援計劃資助超過870萬元。除咗「新聞傳播」外，系統亦重現航空貨運站運作流程，學生可嘗試辨識危險品同違規貨物等；另亦重塑一級歷史建築「虎豹別墅」，讓學生了解其建築特色同歷史意義。