【Emily】九巴8號站牌遠渡悉尼 伴長者治認知症

【明報專訊】九巴有個「巴士站牌捐贈計劃」，除咗本地護老院，近年九巴仲捐到澳洲，繼墨爾本後，九巴向位於悉尼嘅華人服務社高齡頤養院捐贈巴士站牌，話希望啲站牌可以陪伴由香港移居當地、患有認知障礙症嘅長者。

今次九巴捐出8號線巴士站牌，因「8」字喺華人社會有吉利嘅象徵，九巴與院舍溝通後，將巴士路線設定為途經長者較熟悉及深刻嘅香港地標，如尖沙嘴碼頭、九龍公園、裕華百貨、廟街。

正如九巴所講，好多長者過去經常坐九巴，都有好多深刻同熟悉嘅回憶，而華人服務社高齡頤養院照顧咗好多從香港移居當地嘅長者，今次亦貼咗尖沙嘴鐘樓嘅大型相片喺站牌旁邊，畀長者懷緬昔日時光；華人服務社主席周波都話，可以令院友有重回舊地感覺，亦令患有認知障礙症嘅長者得到更有效治療。