【Emily】玫瑰崗中學將停辦 小學校友梁繼昌：傷心

【明報專訊】灣仔區老牌學校玫瑰崗學校嘅小學部及幼稚園，將於2024/25學年由私校香港道爾頓學校接辦，屬津貼校嘅玫瑰崗中學不獲接辦面臨停辦，事件引起爭議。玫瑰崗有唔少名人校友，小學校友、立法會會計界前議員梁繼昌噚日喺社交媒體形容今次係「殺校」，並代表1974年小學畢業嘅校友向辦學團體講，「對你們的決定我們深感遺憾、傷心和失望」。

已離港嘅前區議員畢東尼都留言同梁繼昌校友相認，話「心情實在好難接受」。畢東尼仲話，歌手甄楚倩當年係佢同班同學。

梁繼昌日前評論事件時仲tag其他名人校友，包括陳智思、陳慧琳、張國榮及蔡卓妍；又話幾十年前嘅小一年代，除咗中文及社會科，課程已全用英語授課，仲每星期有兩堂普通話課。新民黨立法會議員容海恩噚日都話自己係中學校友，指事件對家長及學生打擊好大，要求教育局介入。