【Emily】中大醫學院新生白袍禮 陳家亮囑謙卑終身學習

【明報專訊】中文大學醫學院噚日舉辦新生白袍典禮，290多名醫科新生穿上白袍、宣讀誓辭，承諾尊重生命，肩負白袍重任，並盡心盡力照顧病人。醫學院院長陳家亮嘅任期將於明年1月底屆滿，今屆係佢最後一次以院長身分主持典禮。

陳家亮致辭時寄語新生，要識得「孝敬父母、尊師重道」，提醒新生須飲水思源，感激父母養育之恩同老師多年教導；又寄語新生，無論日後擁有幾驕人嘅成就，都要緊記以謙卑嘅態度終身學習，用憐憫嘅心對待困苦無助嘅病人。佢又話，好幸運能夠同一班永遠將學生放喺首位嘅教職員工作，佢之後將繼續追夢，實現自己嘅理想，希望新生都同樣無畏無懼，為理想勇往直前。

中大醫學院自2014年起舉辦新生白袍禮，希望每個醫科生喺學醫之始，就明白穿上白袍不單代表對「醫生」呢個專業嘅承諾，更要背負起社會嘅信任。

主禮嘉賓醫務衛生局長盧寵茂就話，當世界仍在應對新冠大流行時帶來前所未有嘅挑戰時，在座學生立志從醫，「為人類的未來帶來了希望和激勵。我們為你們的選擇感到無比自豪」。