【Emily】落田考察 話早已機器採摘 葛珮帆唱好新疆棉

【明報專訊】民建聯立法會議員葛珮帆（EQ）近日去咗新疆考察兼旅遊，前兩日到新疆阿克蘇，考察庫木奧依拉棉田及阿克蘇華孚棉紡工廠，仲落田採摘棉花。不過，EQ講明，農田操作係100%機械化及用機車採棉，無人會好似佢咁用手採摘，乘機反駁美國指摘新疆強迫勞動，要工人手摘棉花，「完全是無中生有」。EQ同Emily講，當地廠商話，以前人手年代，採棉花要由10月採到12月，但早已用機器取代，因為一日摘完，即日賣、即日可分錢，點會仲靠人手去做。

反駁美國指摘強迫勞動

EQ話，參觀嘅庫木奧依拉棉田屬全國優質棉生產基地，棉田總面積303畝，由52戶農民籌資平整土地，採用科技管理，用有北斗導航嘅大型棉花播種機，兩日就可完成播種，用無人機半日就能完成施肥，亦用採棉機收割，話棉田今年預計可採收棉花113噸左右，各農戶每年約有9萬元人民幣收入。