【Emily】網民熱議夜繽紛舞「白獅」 黃偉綸：係熒光獅子

【明報專訊】政府搞「香港夜繽紛」活動，唔少網民更關心前晚啟動禮嘅舞獅環節用咗「白色」獅子，話白獅通常用喺喪事，唔多吉利。財政司副司長黃偉綸噚日就解畫，話嗰隻其實係「熒光獅子」，仲話聯想係無限嘅，覺得網上討論好有趣，「有啲朋友諗到第二樣嘢，有時一笑置之啦」。

前晚香港夜繽紛啟動禮安排咗舞獅環節，不過嗰隻裝上LED燈、以白色銀色為主調嘅舞獅就引來網民熱議，認為同用於喪事嘅白獅相似。黃偉綸噚日出席商台《在晴朗的一天出發》時解釋，當晚舞獅並唔係白獅子，而係「熒光獅子」，獅頭有好多紅色部分。

對於網上熱烈討論，黃偉綸就認為好有趣，「聯想無限嘅，可能我自己聯想到啲好嘢。你見個獅子嘅舞法好歡欣、好快樂、好繽紛。有啲朋友諗到第二樣嘢，有時一笑置之啦。」