【明報專訊】香港上周四經歷「500年一遇」嘅暴雨，噚日朝天文台再發出紅雨警告，行政會議成員、資深大律師湯家驊（Ronny）嘅辦公室漏水。佢同Emily講，由於辦公室上層係一個露台，估計因而喺暴雨下漏水，好彩電腦同文件都未有「報廢」。
Ronny噚日喺facebook上載辦公室相片，話天花板漏水，Emily見到書枱同地下鋪咗報紙，仲放咗桶同雨遮以免整濕辦公室物品，佢講笑「工作要擔遮也是第一次」。Ronny話，房間係民主思路嘅灣仔辦公室，上周黑雨期間已有漏水，房間唔少物品濕咗，好彩電腦同法律文件無事。佢話近年較多使用呢個辦公室，不過漏水情况嚴重，落雨時難以在內辦公，希望業主盡快維修。
