【Emily】科學館新「古生物展廳」展最完整恐爪龍化石

【明報專訊】尖沙嘴科學館有新常設展廳開幕，「古生物展廳」今日（15日）起，展出超過100組各個時期嘅動植物化石標本同模型。展廳以「滅絕．新生」為開幕展覽主題，6個展區由6億3500萬年前「埃迪卡拉紀」，數到當前嘅時空，歷史最悠久、最「吸睛」嘅展品，包括有30億年歷史嘅疊層石、現時最完整嘅恐爪龍化石、超過3米高嘅真猛獁象化石，同埋3個一比一魚頜骨仿製化石。

最「吸睛」嘅各類化石同機械模型喺最後兩個展區，分別為侏羅紀同白堊紀展廳，以及古近紀至現在嘅展廳先睇到。前者有恐爪龍化石同埋兩隻機械恐龍模型，用作講述呢個時期嘅氣候，如何造就恐龍成為「陸地霸主」，但喺6600萬年前嘅小行星撞擊地球後，佢哋因氣候轉變而開始滅絕；最後嘅展廳講述古近紀開始恐龍滅絕後，首批靈長類動物嘅崛起，展區內就有真猛獁象化石。

新展廳由科學館籌劃，用6個時期劃分展區，以歷史中5次大規模滅絕事件做分界。文化體育及旅遊局長楊潤雄出席開幕禮並致辭，希望大家睇完展覽後更了解地球生態嘅歷史同轉變。科學館成人標準門票20元；展區逢周三免費入場，周四休館。