【Emily】見日本菜餐廳排長龍 領事謝港人對東瀛熱愛

【明報專訊】日本上月開始排放核污水，港府隨即禁止日本10個都縣水產品入口。日本駐港總領事岡田健一噚日出席「日本秋祭in香港」揭幕禮時致辭話，7月訪日嘅香港旅客人次有成22萬，已恢復到新冠疫情前水平，又話見到本港嘅日本菜餐廳依然大排長龍，好感激香港人對日本嘅熱愛。

岡田健一話，香港係日本一個極重要嘅合作伙伴，兩者喺多層面上有着緊密嘅經濟、人員和文化交流，佢希望「日本秋祭in香港」可以進一步鞏固日本同香港之間嘅關係。

今年秋祭已收到逾100份活動申請，佢話舊年活動仍受疫情防疫措施限制，但都有153項活動舉行，相信今年反應都會唔錯。

岡田健一亦對受近期風暴影響嘅香港市民致以慰問，而對於港府搞夜經濟，佢就話願意配合。被問到排放核污水對飲食業影響和港府限制10都縣水產進口事件，佢就話揭幕禮主角係推介秋祭，有合適機會再講相關議題。

第八屆「日本秋祭in香港」會喺10至11月舉行，有超過100項活動，涵蓋電影、表演藝術、藝術與工藝、飲食、體育、知識交流、銷售推廣等唔同範疇。其中香港日本料理店協會將於10月28日至29日喺維園舉辦秋日祭典，設美食攤位、遊戲及表演活動。