【Emily】用聊天機械人 私隱署教「自保」十招

【明報專訊】近年全球掀起生成式AI（人工智能）嘅熱潮，為協助用戶保障個人資料私隱，同更安全咁用AI聊天機械人，私隱專員公署噚日推出《使用AI聊天機械人「自保」十招》，提醒包括同AI聊天機械人傾偈時，唔好分享自己同他人嘅個人資料；有需要時提交改正或移除資料要求；對網絡安全威脅提高警覺；刪除聊天紀錄中唔需要保留嘅對話。私隱專員鍾麗玲希望大家享用新科技帶來嘅好處外，亦學識保障自己個人資料私隱。

自保十招包括：喺登記或使用AI工具前，細閱私隱政策、使用條款等有關處理資料嘅政策；慎防假冒AI聊天機械人嘅應用程式同釣魚網站；調整設定選擇拒絕分享聊天紀錄，避免對話被儲存同用作AI模型訓練。

勿分享個人資料 慎防釣魚網站

十招亦教大家安全同負責任咁用聊天機械人，包括唔好分享機密資料同檔案；老師同家長應從旁指導；以及謹慎使用聊天機械人提供嘅資料。公署提醒，應慎防AI因訓練數據不足同唔準確生成誤導、虛假、或含歧視與偏見嘅資料，記得透過其他途徑fact check，同時亦要避免侵犯知識產權。