【Emily】回應面對挫折 徐英偉：你預咗有先

【明報專訊】前民政事務局長徐英偉（Caspar）上年初因為「洪門宴」風波辭職下台，佢喺香港恒生大學傳播學院節目《恒傳感言》被問到點樣面對挫折同爬番起身，Caspar話「其實唔使面對，你預咗有先」。佢又話自己嘅人生充滿挫折，例如讀書成日唔及格，不過重點係要識得向前看，認為一個完全完美嘅人先係最唔完美，因為世界不斷轉變時，人生就不斷要碰撞，咁先會學識下次做好啲。

「有得揀我都唔想輸勞」

現為酒店業主聯會執行總幹事嘅Caspar喺訪問提到，本地酒店約有8.9萬間房，約有3萬至4萬勞動人口喺酒店業工作，但估計目前仍缺9000人。佢解釋，旅遊業復蘇速度較預期慢嘅主因係人口老化，以及唔同行業惡性循環地搶人，令酒店業人手出現嚴重不足。佢話現時訪港旅客數量只回到新冠疫情前六至七成，若完全恢復到疫前水平，相信業界會「頂唔住」。

被問到酒店業點睇輸入外勞，Caspar強調「有得揀我都唔想輸入」，因為請本地人可以做十幾年。佢又話，有工會會要求提供多啲福利畀工友，等工友無咁易勞損，但正因為咁先請唔到本地人，如果工會唔想工友一個人做6份工，請外勞就可以令工友唔使咁辛苦。