經濟
石榴集團醜聞纏身 董事長下跪道歉
【明報專訊】近年內房市場唔好，好多企業都低調行事，偏偏曾經喺2021年想嚟香港上市嘅內房石榴集團，近月接連爆出多單負面消息，當中最轟動嘅係集團「二把手」前副董事長桑春華被雲核變量集團行政總裁劉夏實名舉報其邀約「多人運動」，又有「搶公章」、股東內訌「鬧分家」等。
性命作信譽擔保 求銀行延續貸款
前日石榴董事長崔巍現身見傳媒，仲情緒激動，喺會場中間跪低道歉，照片及新聞喺內地「刷屏」。原來崔巍係擔心若各家金融機構聽信桑春華對公司嘅污蔑造謠、發起擠兌，或令石榴流動性瞬間凍結，造成流動性枯竭，所以希望銀行、金融機構給予公司一如既往咁支持，畀正常嘅貸款可以延續，正常嘅交易可以完成，唔好畀公司死喺一場無妄輿情之災。
崔巍仲話用性命作保，指歡迎所有金融機構就負債率和淨資產覆蓋率做盡職調查。如果公司實際淨資產覆蓋不足，又畀各家金融機構帶來真實損失嘅話，「將從我們所在的石榴中心22樓一躍而下，我以我的生命作出信譽擔保」。
email: [email protected]
