【Emily】青年創業構思賽公眾投選 冠軍5000元

【明報專訊】香港菁英會喺本月至11月，每個月會搞香港青年節「全民速創」創業構思比賽，參賽者只需喺手機應用程式FoundFast提交創業構思嘅基本描述，頭3名勝出者依次有5000、2000及1000元現金獎，又會同投資委員會一齊設計為期一個月嘅驗證計劃，若計劃成功，可能會被邀請參加初創諮詢公司Inspect Element嘅孵化器，直接接軌香港科學園創科培育計劃。

驗證成功可獲科學園培育

比賽有兩輪，首輪要填寫創業構思名稱、簡單介紹、想解決乜嘢社會問題、描述吓解決方案等，公眾可以喺平台投票同埋反饋，得票前20名嘅創業構思會進入第二輪，參賽者要進一步闡述創業概念，分享市場推廣策略同收入預測，之後再由第二輪公眾投票選出頭3名。參賽者必須係40歲以下嘅香港永久居民，每個參賽者每月最多可以提交3個創業構思，唔使同科技相關。

噚日「全民速創」啟動禮除咗有行會非官守成員陳清霞出席外，仲有之前有傳已辭任民青局青年專員嘅劉家麒，Emily本來打算搵佢fact check下，但劉專員喺活動完結後已唔見咗影。