【Emily】中大醫學院慶40周年 陳家亮沈祖堯捐珍藏拍賣

【明報專訊】中大醫學院為慶祝40周年舉行網上拍賣會，善款將用嚟促進醫學教育、研究、社區服務發展，多個校友捐出私人珍藏同藝術作品拍賣，包括院長陳家亮捐出珍藏20幾年嘅「京劇名伶尚小雲款草書竹筆筒」，前院長沈祖堯捐出節錄自蘇軾《定風波》嘅「回首向來蕭瑟處，歸去，也無風雨也無晴」書法作品。陳家亮話醫學結合科學同藝術，兩者同樣講求敏銳觀察力同觸感，今次多個中大醫學院成員慷慨解囊，突顯大家醫學同藝術範疇嘅修為同涵養，亦希望呈現美感同文化啟發更多人。

另外，本身熱愛攝影嘅副院長（研究）盧煜明就捐出自己一幅瀑布照片，外科學系心胸外科組主任黃鴻亮則捐出3項珍藏，包括《東方之珠》畫作，同埋以墨水筆繪畫J.A. Gosling教授肖像素描，仲有以呢幅肖像畫做酒標嘅4樽威士忌。黃鴻亮話，J.A. Gosling生前係中大一名極受尊重同愛戴嘅解剖學教授。

中大醫學院40周年院慶以「傳．新．全心」為主題，宣揚傳承醫術醫德、創新醫學科研，同埋全心關顧病患嘅精神。