【Emily】律政科罪科 立場案主控伍淑娟掌分隊

【明報專訊】專責反修例案件嘅律政司「特別職務組」因內部人事調整而解散，律政司新增「科技罪行」分科，負責網絡恐怖主義、起底等罪行。Emily近日睇政府電話簿，原來科技罪行科擴充咗兩支檢控隊伍，分別由「立場新聞案」主控、高級助理刑事檢控專員伍淑娟（圖），同埋「35+初選案」控方代表、助理刑事檢控專員羅天瑋帶領。

根據政府電話簿，科技罪行科由初選案主控、副刑事檢控專員周天行統領，當中有兩隊檢控人員，一隊由伍淑娟帶領5個檢控官，另一隊由羅天瑋帶領4個檢控官。

伍淑娟負責立場新聞涉發布煽動刊物嘅審訊，用咗26日盤問立場前總編輯鍾沛權，伍主張鍾沛權政見與立場文章一致，反映佢有意藉文章煽動公眾，令立場成為發布煽動文章嘅「政治平台」。羅天瑋則接手唔少《港區國安法》案件，例如初選案，同埋喺提堂階段處理「蘋果日報案」。