【Emily】香港仔漁港遊 2.5元玩兩個鐘

【明報專訊】由南區龍舟競渡委員會倡議嘅《漁港濃情．香港仔》將會喺下月至11月嘅星期六同星期日，舉辦「香港仔漁港城市暨魚市場精華遊」，參加者只需要畀2.5元船費，就可跟住主辦單位團隊，用兩個鐘探索香港仔嘅獨特風貌，包括水面社區變化、漁業轉型新方向、收魚船喺漁獲批發中扮演嘅角色等，每團名額20至25個，已經開始接受報名。不過基於安全理由，12歲以下嘅小朋友就冇得參加嘞！

魚市場教揀海鮮 不設即場買

精華遊喺鴨脷洲龍竇出發，首先參觀龍竇嘅特色社區角落同漁民文化博物館，之後沿海濱漫步，坐街渡去對面岸嘅香港仔海濱，最後由香港仔漁業海鮮商會會長陳志豪做導賞員，帶大家參觀香港仔魚市場，了解本地漁業運作，仲會教點樣揀靚海鮮?！好彩嘅話，團友會睇到收漁船埋岸，仲有機會睇到新鮮漁獲。不過，由於魚市場係做批發生意，所以團友冇得即場買魚㗎！