【Emily】36體育館直播亞運 為港將打打氣

【明報專訊】杭州亞運會今個月23日就舉行，康文署噚日公布將喺當日至10月8日，喺轄下18區指定體育館設立「亞運直播區」播放亞運會賽事，畀市民感受運動盛事氣氛，同時為出戰嘅香港運動員打氣。

36個指定體育館嘅「亞運直播區」將會喺本月23日夜晚8點起開放，由第二日（24日）起至10月8日，就會由上晝8點開到夜晚10點半。康文署亦設立咗亞運會專題網頁，方便市民瀏覽直播區資料；網頁會上載一系列亞運體育運動入門知識影片，由精英運動員親身講解同示範。

另外，康文署將會喺亞運會開幕當日嘅下晝6點，喺九龍公園體育館副場舉行「杭州第19屆亞運會──亞運直播區啓動禮」，到時會有本地單車和賽艇運動員嘅分享同埋運動示範，歡迎市民出席。