【Emily】調查：避危國安內容 七成校缺YouTube指南

【明報專訊】教師喺網絡搵教材、參考資料非常普遍，民建聯立法會選委界別議員郭玲麗同各區校長聯會早前訪問118名幼稚園、小學及中學校長，了解學界使用YouTube現况，其中逾半學校有自己嘅官方YouYube頻道，主要用於資訊發布和教學，不過同時有七成多學校冇為學生和家長提供YouTube指南或政策，以避免遇到不適當或危害國家安全嘅內容。

訪118校長 逾半校有官方YT頻道

新界校長會會長朱景玄提到，用戶喺YouTube或Google搜索「香港國歌」時，搜索結果並唔係正確國歌《義勇軍進行曲》，認為YouTube作為免費影片串流平台，呢個情况對國家安全教育產生嚴重問題。新界校長會建議學校，為老師、學生及家長使用影片平台提供標準同指導，確保共享內容符合國家安全教育嘅要求，而政府可津貼學校使用YouTube以外嘅串流影片平台。

郭玲麗就認為，調查報告反映有學校關注YouTube可能有內容風險，面對錯誤國歌影片頻繁出現嘅情况，建議教育局制定相關上報機制，又建議推動家校合作，例如舉辦使用YouTube搜索功能講座等。