【Emily】華潤辦北都設計賽 專業組冠軍獎22萬

【明報專訊】政府致力發展北部都會區，華潤置地（海外）有限公司亦主辦「潤心建設．築創未來」青年專業設計大獎，以鼓勵年輕一代策劃北部都會區未來藍圖，由噚日起接受報名。

設計大獎分為專業組及菁英組，前者接受建築師學會、園境師學會、規劃師學會及城市設計學會嘅合資格專業人士，以聯名隊伍形式或個人名義參加；後者就鼓勵本港大學或高等院校嘅學生等參加。專業組冠軍有22萬元獎金，菁英組冠軍有3萬元。

9．19辦分享研討會

華潤話比賽係鼓勵參加者以創意思維打造活力北都，並會喺本月19日舉行分享研討會，屆時評審會討論北都開發嘅契機，參加者亦可藉此加深對北都發展及規劃嘅認識，了解現代都市發展所面臨嘅挑戰，學習點樣因應問題而制訂發展策略等，從而對參賽主題有更具體嘅想法。