【Emily】吳傑莊赴陝「睇水」 訪兩千年鄭國渠

【明報專訊】立法會大會暑期休會，好多議員都把握時間到各地考察，其中身兼全國政協委員嘅選委界議員吳傑莊（Johnny），就跟隨全國政協農業和農村委員會到陝西「專題調研」，了解當地水利發展，仲參觀咗古代水利工程遺址。港府呢期話想搞活夜市，Johnny噚晚仲去咗銅川市嘅夜市，話當地只有70多萬人口，但夜市有當地小食，唔少人坐喺大牌檔食嘢，都算熱鬧。

今次考察主題係「加快建設農業強國，補齊現代農業的弱項和短板」。Johnny話此行先參觀陝西水利博物館，又去到中國古代三大水利工程之一、戰國時代（距今逾2000年）興建嘅「鄭國渠」遺址。佢話此行了解到當地由古代至現代嘅水利發展同埋文化，透過參觀遺址體驗古代工程師嘅智慧同勞動成果，認為水利與農業發展關係密切，農業生產嘅成敗正正取決於農田水利嘅興衰。