【Emily】茶果嶺海濱公園 樹屋源於小朋友奇想

【明報專訊】渠務署早前將觀塘污水泵房上蓋變身成茶果嶺海濱公園，上月底開幕，公園內有樹屋、玩水區，同以往嘅公園截然不同。原來樹屋係小朋友有份構思嘅，至於個玩水區，就係工程團隊喺街頭收集意見嘅結果。

渠署工程團隊：令公園更有趣味

政府新聞網訪問渠務署嘅工程團隊，有份設計嘅工程師團隊就話，本身只係打算將泵房上蓋美化為綠化天台，不過佢哋發現市民想要多啲公共空間，所以就搞唔同活動，其中包括工作坊邀請小朋友去設計公園設施。團隊睇完小朋友親手製作嘅遊樂設施模型後，覺得樹屋構思可行，所以改良同具體化，認為唔止令小朋友有夢想成真嘅感覺，仲可以令公園添趣味。

發展局長甯漢豪噚日都喺網誌提到渠務署喺東九龍一帶嘅海濱休憩空間，唔止介紹茶果嶺海濱公園，仲有翠屏河海濱附近嘅3個工程，其中「活化翠屏河」原定2024年完成，但為加強觀塘海濱同茶果嶺嘅連繫同暢達性，決定提早完成工程；而喺今年年底前，政府仲會逐步落實多個海濱項目，包括灣仔水上運動及康樂主題區（第四期）等。