【Emily】兒童住宿業要人 管牧話輸勞幫助唔大

【明報專訊】香港保護兒童會院舍「童樂居」2021年被揭虐兒事件，立法會議員管浩鳴牧師最近喺議員楊永杰嘅網台節目提到，兒童住宿業界面對人手短缺，而且政府提出立法強制舉報虐兒機制後，有新人反映擔心會坐監而選擇唔入行。管浩鳴希望政府可以為兒童照顧者提供更多培訓，社會同時亦要支持同鼓勵佢哋。

管浩鳴喺節目《杰論分析》話，唔少兒童照顧者都較年輕同埋「血氣方剛」，自己都無仔女、無湊仔經驗，「對住頑劣馬騮點辦呢？」所以佢認為需要畀兒童照顧者明白處理特殊需要小朋友嘅技巧。

政府擴大輸入外勞計劃，但管浩鳴話對兒童住宿界幫助唔大。佢解釋兒童照顧者同長者護理唔同，後者較多厭惡工作，前者除咗需要有相關專業、愛心等，仲要照顧精力旺盛嘅兒童，而且每個兒童嘅情况都唔同，或者會牽動其他兒童嘅反應。佢話希望社會可以明白兒童照顧者嘅處境，如果佢哋因為氣餒轉行，「就真係唔知點算」。