【Emily】葉劉尋根 佛山睇家訓講「和」 話同葉問同村 會銘記做人要寬大

【明報專訊】立法會大會休會期間唔少議員離港，新民黨主席葉劉淑儀就把握機會展開「尋根之旅」，日前返家鄉佛山探親遊覽。佢話因為忙於工作，已經近10年未曾回鄉，今次發現家鄉進步唔少，又引述「劉氏家訓」提及要培養「寬和之氣」，認為現今世代需要保持寬大、慈和，佢會銘記於心。

葉太日前同黨友劉文杰、盧曉楓返咗佛山，到訪家鄉南海獅山鎮白沙橋羅村，葉太話原來佢嘅家鄉同詠春宗師葉問同村。葉太話自己近10年未返過家鄉，感到慚愧，今次回鄉除咗同堂嫂、堂妹重聚，其他村內鄉親仍然認得佢，顯得十分熱情，紛紛上前同佢擁抱握手，佢話十分高興同難得。

葉太此行亦參觀咗村內嘅劉氏大宗祠，除咗同族譜合照，亦特別留意到「劉氏家訓」。佢話據說家訓可以追溯到公元197年，其中一句提及劉氏後人要緊記培養「寬和之氣」，即係保持寬大、慈和，佢認為今日無論係個人、家庭定社會都需要「寬和之氣」，覺得極有意義，會銘記於心。