【Emily】開放日同參觀者數部門三大優勢 林定國：入律政司或可覓伴侶

【明報專訊】律政司前日舉行首次「律政i-Day」開放日，律政司長林定國噚日喺facebook提到，自己喺開放日活動同出席者分享加入律政司嘅三大吸引力，其中一樣係大讚「政府係出名嘅好僱主」，形容做政府律師唔止「薪高糧準」，仲「穩步上揚」，唔使擔心如律師樓會因生意差而倒閉嘅風險。

話待遇穩步上揚 工作眼界大開

本身係資深大律師嘅林定國提到，加入政府前做大律師差唔多30年，亦做過暫委法官，加入政府後工作千變萬化，每日面對嘅事都令佢眼界大開，絕非私人執業可比，呢個就係第二個吸引力。

另一個吸引力就係「樹大好遮蔭」，因為律政司擁有龐大律師團隊，佢特別知道好多年輕人未有對象，話可能可以喺律政司搵到終身伴侶。講到喺律政司工作咁有吸引力，仲出動埋「搵對象」作招徠，唔知能否「搶人才」？