【Emily】打機片當飛機意外被笑 方國珊：農曆七月眼殘睇錯

【明報專訊】近年網上流行直播打機片段，西貢區議員方國珊最近就擺出「大烏龍」，將模擬飛機故障緊急降落嘅遊戲機片段，當成真實意外，喺facebook分享話客機「真係經歷生死關頭，相信機內乘客應該全部驚魂未定」。帖文引來網民嘲諷，方國珊刪帖後主動解釋，話係因為「農曆七月眼殘睇錯嘢」。

方國珊噚日喺fb分享網上打機直播片段，遊戲模擬一架客機出現故障後緊急降落機場。唔知係咪因為遊戲畫面太逼真，方國珊信以為真，話「這部印度民航客機，真係經歷生死關頭，相信機內乘客應該全部驚魂未定，嚇到花容失色，真係險過剃頭」。

帖文引起熱議，方國珊其後已刪帖，並主動回應事件，解釋「農曆七月眼殘睇錯嘢，各位ching（師兄）唔好意思」，並加上標籤自嘲「對唔住天真咗」。有網民留言附上早前帖文截圖，方國珊大方回覆話「有圖有真相」。