【Emily】「東蒲」廉租工作空間 可玩Ninja Warrior

【明報專訊】東華三院新青年中心、位於新蒲崗嘅「東蒲」今年第二季起分階段投入服務，Emily噚日去參觀，見到有唔少培養年輕人發展才能嘅設備。位於1樓嘅共享工作空間有25個私人辦公室同45個流動辦公桌出租，支援40歲以下創業者同初創企業，辦公室月租由5000至1萬元不等，辦公桌就月租1200元（「早鳥價」800元）。負責人話租場反應熱烈，私人辦公室只剩3間。

東蒲仲有佔地約223平方米嘅綜合運動訓練場，大人細路都可試玩「Ninja Warrior」極限障礙訓練運動，不過預約設備要先申請做東蒲會員。中心2、3樓設有國際交流營舍，為來港嘅海外及內地青年提供30間客房共超過100個宿位。

東華三院社服科主管婁振陽同Emily講，營舍仲會向公眾開放，參與中心活動後可即時預約當晚嘅房間「Staycation」添！不過，營舍仲申請緊賓館牌照，預計年底有首批人入住。