【Emily】區選派3人 新思維要籌70萬 狄志遠出席民主黨下周晚宴

【明報專訊】區議會選舉12月舉行，新思維早前宣布積極考慮派3人出戰，黨主席狄志遠噚日話預計要籌款約70萬元應付選舉開支，希望各方支持，仲話萬一財政負擔唔到，唔排除要減少參選人數。另外，民主黨下星期舉行籌款晚宴，阿狄話將會出席支持，希望晚宴唔會再被留難。

年底區選，新思維積極考慮派出副主席黃俊瑯、地區主任彭意婷（Marie）喺油尖旺參選，另一副主席崔定邦就出戰將軍澳。阿狄噚日搵埋黃俊瑯、彭意婷同傳媒茶敘，話預計區選總開支約100萬元，黨內現有約30萬元資金，要再籌款70萬。阿狄提到曾經搵過其他有意參選嘅民主派，希望大家協調，每區只有一個非建制派候選人。近日已積極落區嘅Marie就話街坊反應不俗，正同志同道合嘅年輕人開展地區工作，爭取後生仔女支持。

盼協調每區一個非建制候選人

民主黨下周一（9月4日）舉行籌款晚宴，曾任民主黨副主席嘅阿狄話，將與同樣曾係民主黨成員嘅新思維秘書長陳家偉出席支持。阿狄話份屬好友嘅民主黨創黨成員李華明早前邀請佢出席，佢認為大家都係支持民主，又認為中央都想民主黨參與區選，希望晚宴唔會再被留難。