【Emily】曬太陽「被捕獲」 水巨蜥送返嘉道理

【明報專訊】嘉道理農場暨植物園嘅水巨蜥Aberdeen今個月10日走失，事隔兩個幾星期，園方噚日話周日（27日）中午接到一名正在園內行山嘅遊客致電，話發現一條大蜥蜴喺馬路中心曬太陽，地點正是水巨蜥走失位置附近嘅梯田。當時值班嘅動物護理員收到消息，即刻趕去，發現Aberdeen喺樹上休息，走近時Aberdeen又爬番落地係咁跑，好在一名身手敏捷嘅護理員上前將佢捉住，之後帶佢去獸醫院，獸醫為佢檢查身體同畀水佢飲，隨後送番原本居住嘅爬行動物觀賞台。

嘉道理農場暨植物園噚日喺facebook公布Aberdeen回家嘅消息，話佢似乎對冒險之旅突然中斷有啲沮喪，但當佢重返熟悉嘅家園後，逐漸恢復正常，仲同一齊住嘅陸龜老朋友玩。

走失位置附近搵番 檢查無恙

園方特別感謝發現Aberdeen並通知園方嘅行山客。園方對Aberdeen重返家園感到高興，話佢會繼續履行重要任務，喚起公眾對水巨蜥及非法貿易嘅關注，又向提供協助嘅市民致謝，亦感謝漁護署職員過去一周喺炎熱同潮濕嘅天氣下參與搜索。