【Emily】推Ｗeb3發展 吳傑莊倡立法 護虛擬資產擁有權

【明報專訊】政府最近致力推動Web 3.0發展。選委會界別立法會議員吳傑莊（Johnny）噚日同傳媒茶敘，並邀請咗幾名嘉賓，講解Web 3.0技術應用、規管、發展所需嘅產業配套。

機構推信用評級 助辨投資風險

香港虛擬資產評級機構HKVAC（Hong Kong Virtual Asset Consortium）顧問伍子權話，為咗有效反映交投走勢，機構建立機制，選取30項具代表性嘅虛擬資產去設立加密貨幣指數，就好似恒生指數咁，畀投資者掌握每日市場表現。另外，HKVAC又計劃聯同證監會持牌機構，推動虛擬資產交易所信用評級機制，幫投資者辨識風險。

吳傑莊話，喺內地政府限制虛擬資產交易下，唔少內地投資者因此過嚟香港投資。至於政府早前修訂通過《打擊洗錢及恐怖分子資金籌集條例》，自今年6月起實施，條文涵蓋虛擬資產交易平台發牌制度，佢認為香港長遠有需要針對虛擬資產，設立專屬法例，包括保護資產嘅擁有權等，以推動Ｗeb3發展。