【Emily】裸買節周六開鑼 均香餅家有份供貨

【明報專訊】環團「綠領行動」舊年10月舉辦首屆「裸買生活節」，畀市民體驗無包裝購物嘅樂趣，鼓勵佢哋自備容器購物，而第二屆「裸買生活節」將會喺呢個周末、即9月2日至3日喺觀塘YM2裕民坊舉行，共有37個攤位參與，老字號「均香餅家」都有份，到時會賣雞仔餅同雞蛋餅等。

裕民坊舉行 37商戶參與

綠領行動嘅首間裸買店「綠領駅」以往都有賣均香餅家嘅餅點，佢哋噚日就去到均香舖頭攞貨。綠領行動總幹事何漢威話，綠領駅約九成貨係本地品牌，當初同均香合作，係由綠領行動嘅同事主動拍板，聯絡餅店第二代老闆吳鎮江，對方欣然答應將佢哋嘅餅點放喺裸買店賣，?家平均一至兩周就去餅店攞貨，雞仔餅、雞蛋餅同嚤囉酥三者必不可少。

吳鎮江就覺得無包裝反而節省成本，需要人手包裝嘅時間亦會縮短，甚至多咗人會自備食物盒買餅。不過想自備容器減一蚊，就似乎難啲喇，佢話：「我5蚊個麵包都好難減㗎喎，我減一毫子囉。」