【Emily】深水埗空氣導賞團 了解社區活動空氣質素關係

【明報專訊】團體「健康空氣行動」噚日（27日）聯同街坊及市民，到深水埗參與「空氣導賞團」，去咗6個街坊常去嘅地點，用空氣監察儀器量度空氣污染水平，導賞員沿途又會分享深水埗區歷史故事，畀參加者了解社區活動與空氣質素嘅關係。

導賞團由鴨寮街開始，徒步行到安置欽州街臨時小販市場（「棚仔」）小販嘅新棚仔布藝市場，團體提到「棚仔」1978年啓用，因當年政府要起深水埗地鐵站，那時只預計運作5年，「結果一臨就臨咗四十幾年」。參加者又同搬到新布藝市場嘅檔主傾偈，了解點解佢哋堅持做布販。團體之後用空氣監察儀，喺場內量度空氣污染水平，發現二氧化氮濃度為35微克/立方米，係6個地點中最高。

團體發現基隆街大牌檔嘅PM10濃度稍微高過其他地點，之後去到通州街公園、深水埗警署及東沙島街收集數據，團體話噚日空氣質素良好，加上假日車流量少，所以短期空氣污染水平相對低。導賞團臨近尾聲，亦有向參加者介紹位於警署天台上嘅政府監測站。團體認為每區得一個監測站遠遠唔夠，全港都應該增加數量，都可將數據公開，「就算好定唔好，市民都有需要知」。