【Emily】患白內障要開刀 田二少聯想旅業要更新

【明報專訊】實政圓桌立法會議員田北辰今日73歲生日，佢辦公室嘅一班兄弟噚日佈置好晒，買埋蛋糕同佢提早慶祝，不過田就慨嘆歲月催人，最近仲有件事令佢想唔認老都唔得——原來佢去咗搵議員兼眼科醫生林順潮檢查對眼，發現「鏡頭發咗霉」，即開始有白內障，建議換過粒人工晶體。

田北辰提到，佢前幾日返香港時，望住機場大銀幕嘅航班資料，發現雙眼矇查查，周三（23日）見特首李家超提《施政報告》建議時，距離三四米都唔係好睇得清楚特首嘅表情，初時以為自己近視度數有變，檢查過後先知係白內障，已安排遲啲做手術。

今次都令田北辰反思，一個人生活幾檢點，有啲嘢都唔到你控制，話正如一個城市，有啲嘢舊咗、老咗、啲人去厭咗，就會慢慢失去吸引力，但只要加番啲新嘢，就可以帶嚟全新景象，建議政府喺欣澳搞賽車場吸引遊客。