【Emily】歐盟辦借場 居港烏克蘭人慶獨立日

【明報專訊】俄烏戰事爆發一年半，雖然烏克蘭未加入歐盟，歐盟駐港澳辦事處噚日就借場畀一班住喺香港嘅烏克蘭人，舉辦活動慶祝烏國獨立32周年，佢哋帶咗一幅由烏克蘭空軍一隊前線小隊成員簽名嘅國旗，呼籲外界繼續支援，令前線軍人可以早日同家人團聚，又話唯一接納同俄羅斯和談嘅條件，係對方無條件投降撤離。

歐盟駐港澳辦事處主任高宇馳話樂意協助在港嘅烏克蘭人，又話歐盟會一直支持烏克蘭。

除咗比較沉重反思戰事嘅部分，噚日活動亦表演咗烏克蘭同歐洲特色歌曲，高宇馳仲拉埋其他出席嘉賓聞歌起舞。一班在港烏克蘭人同Emily講，本月29號下晝會喺灣仔哥德學院舉辦小型市集，到時除咗烏克蘭手工藝、裝飾同音樂表演，市民亦可以試著烏克蘭服裝同面部繪彩。