【Emily】中環海濱9月手工啤酒節 飲到10點

【明報專訊】正當政界近期為振興夜市苦思對策，市場反應都好快，9月15及16日喺中環海濱將有一場手工啤酒節，有音樂表演同其他戶外遊戲，可以飲到10點。先前另一個音樂節一度被限制入夜後唔畀賣酒，需要議員介入先可以飲到9點。手工啤酒節主辦單位截稿前未回覆Emily活動嘅臨時酒牌具體有咩要求。

手工啤酒節《好在有啤酒》由音樂節Clockenflap班底同手工啤酒協會合辦，收費都同Clockenflap睇齊，睇番官網，禮拜五或禮拜六晚（6點至10點）「早鳥價格」各收520元，星期六嘅日間就平少少，400元一位，如果連續兩日暢飲就要1310元。不過，活動號稱每節4個鐘頭內無限暢飲，仲有20間本地釀酒廠同經銷商提供總共150幾款啤酒選擇。

值得留意嘅係，活動晚間時段只容許18歲以上嘅人進場，同埋根據入場守則，如果被認為醉咗，將會被要求離場。