【Emily】醫學博物館展舊式醫療器具 有「胎心聲機」

【明報專訊】位於上環嘅香港醫學博物館聽日（26日）起有新嘅「現代醫學」展覽，分為常設同專題展區，前者圍繞現代醫學發展史，專題就以婦科醫學為主，參觀者可以睇到多件1930至1950年代嘅醫療器具，包括舊式「胎心聲機」、膀胱同埋大腸鏡等外科器具。參觀者到時仲可以試用模擬手術器具，體驗點樣做微創手術。

Emily行完今次展覽，四大「鎮店之寶」非「胎心聲機」、「大小膀胱鏡」及「助產士日誌」莫屬。先講胎心聲機，由1967年出產，到1980年代停產，而呢次展出嘅一部係以前用於養和醫院，由院方12年前捐出。捐出嘅醫生話，呢部機到1990年代依然用緊，方法係放喺母體左面胸口，醫生就可以從中聽到胎兒心跳。至於大小膀胱鏡，「大鏡」技術1900年左右已經出現，不過展出嘅展品生產於1950年，可以用作診斷同治療。展品中歷史最久遠嘅「小鏡」只能用作診斷，比「大鏡」早10年停用。

至於助產士日誌，係全場唯一非外科用具展品，記錄咗1947至1948年嘅案例，係由贊育醫院一個實習助產士所寫，內容包括描繪佢處理過嘅胎盤狀况、照顧流程等。時至今日，助產士培訓依然使用紙本日誌。