經濟
《福布斯》質疑盧啟賢誇大身家 任德章：撐報道 拒道歉
【明報專訊】金融圈上月最大嘅花生，要數有「富豪保險經紀」之稱嘅R.E. Lee International行政總裁盧啟賢（Calvin Lo），被《福布斯》質疑佢誇大身家資產、學歷都有造假之嫌，又離奇獲前藝人、美容纖體公司修身堂（8200）老闆張玉珊（Shirley）認愛，之後有網站引述《福布斯》控股股東任德章表示，佢與張玉珊相識多年，亦認識盧啟賢，但他唔能夠控制旗下傳媒言論，形容事件係盧啟賢英國公關公司處理失當，雙方已握手言和。
正當小琴以為半路殺出來認愛嘅張玉珊起到關鍵作用，擺平咗盧啟賢嘅是是非非。點知事隔近一個月，任德章噚日突然喺《明報》刊登聲明，指7月26日《福布斯》發表有關盧啟賢嘅文章，想澄清「我支持《福布斯》的報道，特別是完全支持這篇關於盧先生的文章」。
強調無接受任何港媒訪問
任德章指出，無就《福布斯》文章接受過任何香港出版物嘅採訪，他唔會亦無就報道道歉，強調「任何與此聲明相反的想法都是錯誤的。」
任德章突然否認接受過傳媒採訪，小琴自然要搵番當日嘅報道研究，但相關報道原文已全部離奇消失，加上任德章強調支持《福布斯》嘅報道兼唔會道歉，今次孰是孰非，真係要讀者自行判斷。
