【Emily】麥花臣招聘會助少數族裔搵工

【明報專訊】勞工處同民建聯少數族裔服務中心噚日及今日喺旺角麥花臣場館舉行「共創多元文化工作間招聘會」，約50間機構參與，提供約4300個空缺，包括工程師、廚師、咖啡師等，希望促進求職者包括少數族裔嘅就業機會，可以即場遞交申請同面試，首日有1219人入場。Emily見唔少攤位都有非華裔職員當值，現場設有印度語、尼泊爾語等即時傳譯服務，幫少數族裔同僱主溝通。

喺香港工作超過20年、孟加拉裔嘅Niaz話，近年公司因新冠疫情生意轉差，失業約一年，想搵份全職工作，即場交咗5份申請表，希望有回應。佢話過去14年喺香港從商，習慣全英文工作環境，只識少少中文，失業後就發覺搵工好難。

懲教署話空缺率高 「請得幾多得幾多」

懲教署同警務處都有攤位介紹工作機會同投考資格，懲教署懲教主任（人力資源組）黃華威話，當本地同外籍在囚者發生衝突，非華裔人員可以做溝通橋樑，部門現有56名非華裔職員，又話整體空缺率高，「請得幾多得幾多」。