【Emily】許智峯獲澳洲律師資格 冀長遠專注人權國際法

【明報專訊】被警方國安處懸紅100萬元通緝、正流亡海外嘅立法會前議員許智峯（圖），噚日喺facebook透露近况，提到出席完南澳洲最高法院嘅律師認許聆訊（admission hearing），宣誓後獲法庭頒令正式確認律師資格。佢現於阿德萊德市中心嘅一間本地律師行做事務律師，主要執業範圍係民事同商業法，長遠希望專注人權法同國際法，亦會計劃加入澳洲嘅律師會或其他法律專業團體嘅管治架構。

許智峯透露，當年讀大學係法律系畢業，但喺香港時只係做過立法會議員同區議員，最多嘅出庭經驗係被政府刑事檢控，同埋循民事告政府或提私人檢控，未試過自己做律師，成為律師嘅心情既興奮又戰戰兢兢。

佢又提到喺普通法制度下，法庭對律師嘅品格有嚴格審查，喺申請律師資格時要向法庭同律師會申報佢喺香港嘅所有刑事紀錄，埋單計數一共申報咗23條控罪同7項通緝令。佢又話，自己唔係香港律師，相信律師會同大律師公會唔可以對佢有任何評價或行動，而因為佢係「被通緝港人澳洲律師」，若受指控，澳洲律師會要關注同發聲。

特區政府發言回應話，許智峯因涉犯國安罪被通緝，也曾因其他罪行棄保潛逃，話「許智峯是罪犯」，任何人同佢有業務往來時都應格外小心。