【Emily】隔9年訪疆 梁美芬欣慰「回復原樣」

【明報專訊】立法會暑期休會，唔少議員都會趁機外遊，其中經民聯議員梁美芬就時隔9年再次去新疆考察。佢噚日喺社交平台話，少數民族同漢族人民一齊歡聲笑語、載歌載舞嘅畫面，令佢無比欣慰，好開心見到新疆回復到記憶中嘅模樣。

梁美芬造訪喀什古城後話，重建工程不但提升咗房屋嘅安全，仲保留當地嘅優質民俗；而部分年輕人更由繁華大都市返到新疆開咖啡廳、雪糕攤。佢向政府官員、駐紮喺民族農村嘅基層幹部致以最崇高嘅敬意，話佢哋為少數民族農村嘅脫貧重建做出咗卓越貢獻。

梁美芬又分享之前兩次到訪新疆嘅經歷。佢憶述，1984年首次踏足新彊嗰陣，當地嘅藍天、草原以至漢族同少數民族嘅友好情誼，令到大學時期嘅佢「深深愛上這片祖國熱土和湛藍天空」。不過梁美芬話，到2014年第二次踏足新彊嗰陣，當地政治氣氛緊張，訪問途中南疆更發生恐怖襲擊，當時情景令佢黯然神傷，亦「為那些被極端思想誤導的年輕人與國家產生政治衝突感到痛心」。