【Emily】《施政》建議 G19倡生得愈多交稅愈少

【明報專訊】特首李家超將喺10月發表《施政報告》，由18名無政黨立法會議員組成嘅「G19」噚日同李家超會面提交建議書，提議推出「累進式子女免稅額」鼓勵生育，按子女數目增至15萬至25萬元。G19召集人謝偉銓話，?家本港房屋「重公輕私」，認為部分新發展區可以研究增加私人住宅嘅比例，有助市民向上流動。

房屋「重公輕私」 籲研增私樓比例

本港生育率一直下跌，G19促請政府採取措施鼓勵生育，包括推出「累進式子女免稅額」，建議首名、第二名及第三名或以上嘅子女免稅額，分別增至15萬、20萬同25萬元，做到「生得愈多，交稅愈少」。G19又提出，為父母同係永久居民嘅新生嬰兒提供2萬元「新生嬰兒現金津貼」。

至於房屋問題，G19就提議將居二市場嘅按揭還款保證期由30年延長至60年，因為?家近九成居屋樓齡都超過20年，延長保證期可以令買家向銀行爭取更長嘅按揭年期，幫助到市民透過居二市場「上車」。有意見認為樓市應該「撤辣」，謝偉銓話要考慮可唔可以直接幫助到基層置業。

金融服務界嘅李惟宏就話，面對高息環境、地緣政治複雜、經濟有待復蘇等因素，業界普遍希望可以減低股票印花稅，短期刺激股市，但具體減幅就有唔同意見。