【Emily】房署查樓少用科技靠人手 田二少搲晒頭

【明報專訊】廉政公署前日起訴一個房屋署職員，涉嫌虛報家訪紀錄，實政圓桌立法會議員田北辰認為，?家科技發達，好多靠人手嘅工作已經可以靠自動化系統處理，建議政府改用大數據同人工智能等技術，透過新式軟件監測單位嘅用水、用電模式，簡易辨別單位嘅居住情况。

政府想大力發展創科，但田北辰認為成個政府「完全係分兩條隊走」，講未來科技就天下無敵，去到執法就「有心無力」。

田北辰舉例，之前有市民買咗千萬豪宅，竟然可以用綠表買居屋，佢認為房署只要透過大數據就可以從土地註冊處成交紀錄核查全港公屋住戶有冇物業，佢搲爆頭都諗唔明，點解政府新嘢就講高科技，原有嘅就繼續食古不化。

田北辰認為，講科技化只靠一個局長未必睇得晒，建議為副司長加多一個職責，負責將整個政府做到真正科技化，善用科技執行職務，打擊任何濫用、違規等。