【Emily】靈活行日均300人用 少數客晚間需以「座」換「企」

【明報專訊】高鐵從周一（14日）起推出「靈活行」變更車次安排，港鐵噚日話每日平均有300人使用服務，至今整體運作大致暢順，大部分乘客都獲安排同等級座位，只有少數乘客喺晚上繁忙時段被安排「企位」。

來往西九龍站同埋福田站嘅乘客，除咗可以按原有嘅「一般改票」程序喺列車出發前免費改票一次外，乘車當日亦可透過「靈活行」，喺原定班次開出前45分鐘至開車後1小時內，免費改乘同日車次最多3次，方便有急事要調動行程或者錯過列車嘅乘客。

港鐵話，西九龍站已加強咗車站嘅指示同資訊發放，同時喺車站設立諮詢櫃位，並派出「靈活行」大使協助乘客。港鐵話會密切留意「靈活行」實施後嘅運作情况，並同內地鐵路單位緊密聯繫，尋求更多方便乘客嘅措施。