【Emily】環署推「泳灘水質預報」 4級勿落水

【明報專訊】夏天有唔少人去泳灘，環保署最近推出「泳灘水質預報系統」，市民即日起可透過手機應用程式或環保署網頁，睇到全港所有開放嘅公眾泳灘水質預測數據。

新系統顯示，噚日全港43個公眾泳灘之中（包括42個憲刊泳灘及1個非刊憲泳灘，即愉景灣），有19個水質為1級（良好），20個水質為2級（一般），餘下嘅石澳後灘、夏萍灣同雙仙灣因康文署無提供救生服務唔開放，所以無評級。前年啟用嘅大埔龍尾泳灘，噚日嘅水質預測指數為2級（良好）。

環保署話呢個系統係同科大合作研發，依據各泳灘嘅微生物、降雨量同水溫等數據，預測每日泳灘嘅大腸桿菌水平，將結果化為「泳灘水質預測指數」，方便市民計劃水上活動。指數分為1至4級，1級屬良好，4級屬極差，當預測結果係4嘅時候，市民應考慮避免落水。